|
Last Updated: Jun 28, 2009 - 7:57:43 AM |
Bloemfontein. – Dit help niks om te baklei vir die behoud van Afrikaans
as onderwystaal as Afrikaanse ouers in elk geval hul kinders toenemend
na Engelse skole stuur nie.
So het dr. Michael le Cordeur van die Universiteit van Stellenbosch
(US) gister op eeufeesvieringe van die SA Akademie vir Wetenskap en
Kuns gesê.
Le Cordeur het in ’n lesing – “ ’n Geloofwaardige onderwysstelsel vir
Suid-Afrika” – gesê dit help veel as Afrikaanse regte in die Grondwet
verskans is, maar “geleerde Afrikaanse ouers” het vertroue in die taal
verloor.
Ouers se neiging om hul kinders na Engelse skole te stuur, spruit uit
hul beskouing dat dit aan hul kind ’n voorsprong sal gee vir verdere
studie en om werk te kry.
“Mense is nie dom nie. Hulle hoor ons praat van die waardevolle rol van
moedertaalonderwys, maar sien dat vooraanstaande Afrikaanse én bruin
leiers hul kinders na Engelse skole stuur.
“Dit laat onwillekeurig die vraag ontstaan of hulle iets weet wat ons
nie weet nie.”
Le Cordeur het gesê ouers speel deur hul deelname in beheerliggame ’n
belangrike rol in die bevordering van moedertaalonderwys.
Hy het ook sy kommer uitgespreek oor die groot ongeletterdheidsyfer
onder veral arm Afrikaanssprekendes.
“Tekens bestaan dat die situasie onder invloed van kreolisering met
Engels en Kaaps versleg. Dis nice vir sekere celebrities om te praat
van hoe cool Afrikaanse musiek is, maar dit werk vernietigend in op die
gehalte van Afrikaans wat in ouerhuise en later ook in die klaskamer
gepraat word.
Source:Ocnus.net 2009
Top of Page
